Izarak

 

Ohe bazterrean besarkatu ginenean

maitasun poema bat eskatu zidan.

Izterrak ene giltzurrunen inguruan

hestutu zituenean maitasun poema bat eskatu zidan

berriro.

Zer egin? Poeta ofizioa ez da erreza,

Rainer Maria Rilkek

poesia odolezko izerdia dela

esaten zuen

zertarako ekarri izua eta ikara

izara artera...

Larruak ematen duenarekin aski da,

eta dena dela

larrua jotzeko ez da derrigorrez giro hain

poetikorik behar.

Biluzten bagara errazagoa da.

Joseba Sarrionandia.